Orania Verblyf en Toere

Opsoek na verblyf in Orania? Langs die dig beboste oewer van die Oranjerivier, tussen die koppies en uitgestrekte velde van ’n sprokieswêreld Karoolandskap, wag ‘n unieke ervaring op die besoeker in die hartland van die Afrikaner.

Orania is meer as net ‘n pragtige dorp met talle besienswaardighede, gasvry inwoners en prettige aktiwiteite vir jonk en oud. Orania is die hartklop van die Afrikaner se vryheidsideaal, die verwesenliking van ons volk se eeue-oue hunkering na ‘n plek in die son waar ons onbeskaamd ons geloof, taal, tradisies en kultuur kan uitleef.

Orania is ook meer as net ‘n gemeenskap. Dit is die groeipunt van 'n Afrikaner Republiek waar ons selfbestuur kan toepas en met trots ons eie kan bemagtig.

‘n Besoek aan Orania is ‘n ervaring wat ’n mens van meet af vul met sielerus en hoop, maar terselfdertyd ook met ’n energie wat ons laat besef wat werklik bedoel word met Afrikaner-vryheid.

Die pragtige Orania Oewerhotel en Spa is geleë op die boomryke oewer van die Oranjerivier in die pragtige Bo-Karoo. Ons gaste word bederf met luukse 4ster geriewe en die einste vriendelike Afrikaanse gasvryheid waarvoor Orania wêreldwyd bekend staan.

Die Orania Oewerhotel en Spa bied 12 stylvol versierde kamers met en-suite-badkamers. Ons idilliese ligging is perfek vir 'n ontspanne wegbreekkans vir die familie, asook 'n romantiese ontsnapping saam met die spesiale persoon in jou lewe. Chalets is ook beskikbaar op aanvraag.